«Жунда» мунай иштетүүчү заводу жылына 850 миң тоннага чейин күйүүчү май өндүрүүгө даяр. Бул тууралуу Нефтетрейдерлер ассоциациясынын жетекчиси Канат Эшатов Биринчи радиого билдирди.
Анын айтымында, ишкананын кубаттуулугу күйүүчү-майлоочу майга болгон ички керектөөнүн жарымын канааттандырууга мүмкүндүк берет.
Канат Эшатов заводдун кайрадан ишке кириши биздин өлкөдө күйүүчү майдын баасына оң таасирин тийгизет деп эсептейт. Эске сала кетсек, “Джунда” мунай заводу 2019-жылдан бери токтоп турат. Буга чейин Кытайдын Шаньсин көмүр жана химиялык өнөр жай корпорациясынын өкүлдөрү «Жунда» мунай заводунун курулушунун экинчи этабын баштоо ниетин билдиришкен. Алар европалык К5 стандартындагы мунай продуктуларын терең кайра иштетүүгө жана полипропилен өндүрүүгө басым жасамакчы. Ишкананы модернизациялоодон кийин быйыл ишке киргизүү пландалууда.