24-октябрда Кара-Балта шаарындагы «Джунда» мунайды кайра иштетүүчү заводунда ишкананын кызматкерлеринин арасында Профсоюздун футбол боюнча үчүнчү жылдык кубогу өткөрүлдү. Мелдештин максаты — кызматкерлердин ден соолугун чыңдоо, сергек жашоо образын жайылтуу, ошондой эле жамаат ичиндеги баарлашууну жана ынтымакты бекемдөө.

Мелдештин жыйынтыгы боюнча командалар төмөнкүдөй орундарга ээ болушту:

🥇 1-орун — Техникалык жана экологиялык коопсуздук бөлүмү;

🥈 2-орун — Сактоо жана ташуу цехи;

🥉 3-орун — Биринчи камералык кызмат;

4-орун — Өрт өчүрүү кызматы.

Спорттук турнир «Джунда» компаниясынын салттуу иш-чараларынын бирине айланып, жамааттык духту чыңдоого жана кызматкерлердин ортосундагы достук мамилелерди бекемдөөгө өбөлгө түзүүдө.

Мындан тышкары, компания Кара-Балта шаарында спорттун жана маданияттын өнүгүшүнө колдоо көрсөтүп келет. Атап айтканда, «Манас» спорт клубунун баскетбол командасынын өзүнүн спорттук залы убактылуу иштебей турган мезгилде, компания машыгууларды өткөрүү үчүн өзүнүн спорт залын пайдаланууга берген.

Компания мындан ары да жергиликтүү коомчулукту колдоого, аймакта спорттун өнүгүшүнө көмөк көрсөтүүгө жана корпоративдик социалдык жоопкерчилик жаатындагы милдеттенмелерин аткарууга ниеттенет.