10-ноябрда Кыргыз Республикасынын Президентинин алдындагы Улуттук инвестициялар агенттигинин директору Равшанбек Сабиров баштаган делегация ЧПК «Джунда» ишканасына жумушчу сапар менен барды.

Сапардын жүрүшүндө мунай продуктуларынын сапатын жогорулатууга багытталган модернизация долбоорунун ишке ашырылышынын жүрүшүнө, өндүрүштүк жабдуулардын иштөө абалына, ишкананын ишмердүүлүгүндө жаралып жаткан актуалдуу көйгөйлөргө, ошондой эле айлана-чөйрөнү коргоо багытында жүргүзүлүп жаткан иштерге өзгөчө көңүл бурулду.

Делегацияны «Чжунъя Энерджи» компаниясынын башкы директору Юй Шанлин жана башкы директордун орун басарлары Ли Цинвэй менен Хуан Тяньцзинь коштоп жүрүштү.

Сапардын алкагында Равшанбек Сабиров өндүрүштүк объектилердин иши менен таанышып, модернизация долбоорунун курулуш иштеринин жүрүшүнө жеринен баа берди. Ага долбоордун ишке ашырылуу темптери, колдонулуп жаткан техникалык чечимдер жана учурда иштеп жаткан өндүрүштүк жабдуулардын абалы тууралуу кеңири маалымат берилди.

Мындан тышкары, делегация курулуш иштеринин жүрүшү, ишкананын өндүрүштүк-чарбалык ишмердүүлүгү жана айлана-чөйрөнү коргоо багытында көрүлүп жаткан чаралар боюнча баяндамаларды укту. Тараптар ошондой эле учурдагы көйгөйлөрдү жана заводдун мындан аркы ишмердүүлүгүнө байланыштуу бир катар актуалдуу маселелерди талкуулашты.

Равшанбек Сабиров ишкананын өндүрүштүк ишмердүүлүк, техникалык кайра жабдуу жана модернизация долбоорун ишке ашыруу багыттарында жетишкен натыйжаларына жогору баа берди.

Ал өндүрүштүк объектилерди кыдыруунун жүрүшүндө ишкананын туруктуу ишин камсыз кылуу жана техникалык модернизацияны жүргүзүү үчүн жасалып жаткан олуттуу аракеттерге жеке өзү күбө болгонун белгиледи. Анын айтымында, заводдун жалпы абалы Улуттук инвестициялар агенттигинин өкүлдөрүнө жакшы таасир калтырган.

Агенттиктин жетекчиси ЧПК «Джунда» модернизация долбоорун бекитилген графикке так ылайык улантып, пландаштырылган бардык иштерди өз мөөнөтүндө бүтүрүп, ишкананы өнүктүрүү боюнча алган милдеттенмелерин иш жүзүндө аткарат деген ишенимин билдирди.

Жолугушуунун жүрүшүндө ишкананын экологиялык ишмердүүлүгүнө жана заводго жакын жайгашкан калктуу конуштардын тургундары менен өз ара мамилелерди өнүктүрүү маселелерине да өзгөчө көңүл бурулду.

Равшанбек Сабиров ишкананын өнүгүшү жергиликтүү калк менен конструктивдүү жана жакшы мамилелерди сактоо менен коштолушу керектигин баса белгиледи. Бул үчүн ачык диалог жүргүзүүгө шарт түзгөн натыйжалуу аянтчаларды уюштуруу, тургундар менен жолугушууларды өткөрүү жана алар үчүн заводдун аймагына экскурсияларды уюштуруу маанилүү экенин белгиледи. Мындай иш-чаралар калктын өндүрүш процесстери, модернизациянын жүрүшү жана айлана-чөйрөнү коргоо багытында көрүлүп жаткан чаралар тууралуу кеңири маалымат алуусуна өбөлгө түзөт.

Ошондой эле ал жарандардын кайрылууларына жана суроолоруна өз убагында жооп берүү, өз ара түшүнүшүүнү бекемдөө жана жергиликтүү тургундардын ишенимин арттыруу зарылдыгын белгиледи. Бул чаралар ишкананын туруктуу жана узак мөөнөттүү өнүгүүсү үчүн жагымдуу шарттарды түзүүгө өбөлгө болот.